جاۋاب كۈتكەن ھەزىل سوئاللار

ﺳﻮﺋﺎل: «ﺋﻪل ﺋﯩﭽﻰ ﺋﺎﻟﺘﯘن ﺑﯚﺷﯜك» دﯦﮕﻪﻧﻨﻰ ﻗﺎﻧﺪاق ﭼﯜﺷﻪﻧﺴﻪم ﺑﻮلار؟
_ ﻗﻪﺷﻘﻪر ﺷﻪﮬﯩﺮى ﻧﻪزەرﺑﺎغ ﻳﯧﺰا ﺗﻮﻗﻘﯘزﺗﺎش ﺋﺎﮬﺎﻟﻪ ﻛﻮﻣﯩﺘﯧﺘﯩﺪﯨﻦ ﻣﯘﺧﺘﺎر ﺋﺎﺑﻠﯩﺰ

ﺳﻮﺋﺎل: ﺑﻪزﯨﻠﻪر: «ﺋﺎﻳﺎل ﻛﯩﺸﻰ ﭘﻪرزەﻧﺘﻠﯩﻚ ﺑﻮﻟﻤﯩﻐﯩﭽﻪ ﺑﯩﺮ ﭘﯘﺗﻰ ﺗﺎلادا ﺗﯘرﯨﺪۇ» دەپ ﻗﺎراﻳﺪﯨﻜﻪن. ﻣﻪن ﺗﻮي ﻗﯩﻠﻐﯩﻠﻰ ﺗﯚت ﻳﯩﻞ ﺑﻮﻟﺪى، ﺑﺎﻟﯩﻠﯩﻖ ﺑﻮلاﻟﻤﯩﺪﯨﻢ. ﺋﯚﻳﮕﻪ ﻛﯩﺮﺳﻪم ﺋﯩﻜﻜﻰ ﭘﯘﺗﯘم ﺑﯩﻠﻪن ﻛﯩﺮﯨﻤﻪن، ﺋﯘﻧﺪاﻗﺘﺎ، ﻣﻪن «ﺑﯩﺮ ﭘﯘﺗﻰ ﺗﺎلادﯨﻜﯩﻠﻪر» ﻗﺎﺗﺎرﯨﻐﺎ ﻛﯩﺮەﻣﺪﯨﻤﻪن ﻳﺎﻛﻰ ﻛﯩﺮﻣﻪﻣﺪﯨﻤﻪن؟
_ ﻛﻮرلا ﺷﻪﮬﯩﺮى ﺷﺎﯕﺨﯘ ﺑﺎزارﻟﯩﻖ ﭘﻮﭼﺘﺎ ﭘﻮﻧﻜﯩﺘﯩﺪﯨﻦ ﻣﻪرەﺟﻪم ﺳﻪﻣﻪت

ﺳﻮﺋﺎل: ﺋﺎﺗﺎ - ﺋﺎﻧﺎم ﻣﺎﯕﺎ ﻧﻪﺳﯩﮭﻪت ﻗﯩﻠﯩﭗ: «ﮬﻪرﻗﺎﻧﺪاق ﺋﯩﺶ ﻗﯩﻠﺴﺎڭ، ﭼﻮﻗﯘم ﺷﯘ ﺋﯩﺸﻘﺎ ﺟﺎن ﻛﯚﻳﺪۈرۈﺷﯜڭ ﻛﯧﺮەك» دەﻳﺪۇ. ﺋﻪﻣﻤﺎ، ﻛﯩﭽﯩﻜﯩﻤﺪە ﻗﻮﻟﯘم ﺋﻮﺗﺘﺎ ﻛﯚﻳﯜپ ﻗﺎﻟﻐﺎﭼﻘﯩﻤﯩﻜﯩﻦ، ﻣﯧﻨﯩﯔ ﺟﯧﻨﯩﻤﻨﻰ ﺋﻪﻣﻪس، ﺑﺎﺷﻘﺎ ﻛﯩﭽﯩﻜﻜﯩﻨﻪ ﺑﯩﺮەر ﻳﯧﺮﯨﻤﻨﻰ ﻛﯚﻳﺪۈرۈپ ﻗﻮﻳﯘﺷﺘﯩﻨﻤﯘ ﻧﺎﮬﺎﻳﯩﺘﻰ ﻗﻮرﻗﯩﻤﻪن. ﺋﯧﻴﺘﯩﯖلارﭼﯘ، ﻣﯘﺷﯘﻧﺪاق ﺋﻪﮬﯟاﻟﺪا ﻗﺎﻧﺪاق ﻗﯩﻠﺴﺎم ﺗﻮﻏﺮا ﺑﻮﻟﯩﺪۇ؟

ﺳﻮﺋﺎل: ﻣﯧﻨﯩﯔ ﭼﺎﻟﻐﯘ ﺋﻪﺳﯟاﺑﻠﯩﺮى ﻳﻮق ﺑﯩﺮ ﺳﺎزەﻧﺪە ﻗﻮﺷﻨﺎم ﺑﺎرﺋﯩﺪى. ﺋﯘ داپ ﭼﯧﻠﯩﺸﻘﺎ ﺋﺎﻣﺮاق ﺑﻮﻟﺴﯩﻤﯘ، ﺋﻪﻣﻤﺎ ﭼﯧﻠﯩﺶ ﺋﯜﭼﯜن داپ ﺗﺎﭘﺎﻟﻤﺎي ﻳﯜرﯨﺪۇ. ﺑﯩﺰدە «ﺋﯩﻜﻜﻰ ﻧﺎن ﺗﺎﭘﺴﺎ ﺑﯩﺮﯨﻨﻰ داپ ﻗﯩﻠﯩﭗ ﭼﺎﭘﺘﯘ» دەﻳﺪﯨﻐﺎن ﮔﻪپ ﺑﺎر. ﺷﯘﯕﺎ، ﺋﯘ ﻧﺎﻧﺪﯨﻦ ﺋﯩﻜﻜﯩﻨﻰ ﺳﯧﺘﯩﯟﯦﻠﯩﭗ، ﺑﯩﺮﯨﻨﻰ داپ ﻗﯩﻠﯩﭗ ﭼﺎﻟﺴﺎ ﺑﻮلاﻣﺪۇ؟
_ ﻣﻪﻛﯩﺖ ﻧﺎﮬﯩﻴﯩﺴﯩﺪﯨﻦ: ﻳﺎﺳﯩﻨﺠﺎن ﺋﻮﺳﻤﺎن

ﺳﻮﺋﺎل: ﻣﻪن ﺑﯩﺮ ﮔﯧﺰﯨﺘﺘﯩﻦ «ﻗﯩﺰلارﻧﯩﯔ ﻳﯜزﯨﺪﯨﻜﻰ ﻗﻮرۇﻗلار ﻗﺎﻧﭽﻪ ﻛﯚپ ﺑﻮﻟﺴﺎ، ﻳﯜرەﻛﺘﯩﻜﻰ ﻳﺎرﯨﺴﯩﻤﯘ ﺷﯘﻧﭽﻪ ﻛﯚپ ﺑﻮﻟﯩﺪۇ» دﯦﮕﻪﻧﻠﻪرﻧﻰ ﻛﯚردۈم. ﺋﯘﻧﺪاﻗﺘﺎ، ﺋﺎﺗﺎﻗﻠﯩﻖ ﺧﻪﻟﻖ ﭼﺎﻗﭽﺎﻗﭽﯩﺴﻰ ﮬﯧﺴﺎم ﻗﯘرﺑﺎن ﺋﺎﻛﯩﻨﯩﯔ ﻳﯜرەك ﻳﺎرﯨﺴﻰ ﻗﺎﻧﭽﯩﻠﯩﻜﺘﯘ؟
_ ﺗﯘرﭘﺎﻧﺪا ﺗﯘرۇﺷﻠﯘق ﻣﻪﻟﯘم ﻗﯩﺴﯩﻤﺪﯨﻦ: ﺋﻮﺑﯘل ﻣﻪﺗﺘﯘرﺳﯘن

ﺳﻮﺋﺎل: ﺑﯩﺰ ﺋﺎدەﺗﺘﻪ ﮬﺎﻳﯟاﻧلارﻧﻰ ﺋﻪرﻛﻪك - ﭼﯩﺸﻰ دەپ ﺋﺎﻳﺮﯨﻴﻤﯩﺰ، ﺑﯩﺮاق ﻳﯧﻘﯩﻨﺪﯨﻦ ﺑﯘﻳﺎن، ﺑﻪزى ﻛﯩﺸﯩﻠﻪرﻧﯩﯔ ﺋﺎﻏﺰﯨﺪﯨﻦ ﺋﻪر ﻗﯘدﯨﺴﯩﻨﻰ «ﺋﻪرﻛﻪك ﻗﯘدام»، ﺋﺎﻳﺎل ﻗﯘدﯨﺴﯩﻨﻰ«ﭼﯩﺸﻰ ﻗﯘدام» دەپ ﺋﺎﺗﯩﻐﺎﻧﻠﯩﻘﯩﻨﻰ ﺋﺎﯕﻠﯩﺪﯨﻢ. ﺋﯘﻧﺪاﻗﺘﺎ، ﺋﺎدەﻣﻠﻪرﻧﯩﻤﯘ ﺷﯘﻧﺪاق ﺋﺎﻳﺮﯨﺶ ﺗﻮﻏﺮﯨﻤﯘ؟
_ ﻳﯧﯖﯩﺸﻪﮬﻪر ﻧﺎﮬﯩﻴﯩﻠﯩﻚ ﺋﻮﻗﯘﺗﻘﯘﭼﯩلار ﺑﯩﻠﯩﻢ ﺋﺎﺷﯘرۇش ﻣﻪﻛﺘﯩﭙﯩﺪﯨﻦ:ﺋﺎﺑﻠﯩﻤﯩﺖ ﺋﯩﺒﺮاﮬﯩﻢ

ﺳﻮﺋﺎل: «ﺋﯩﺨلاس ﮬﻪرﭘﻠﯩﻚ ﭘﯧﺮەﻧﯩﻜﻰ» ﻧﻰ ﻳﯧﺰا- ﻗﯩﺸلاﻗلاردﯨﻜﻰ ﺳﺎۋادﺳﯩﺰلارﻏﺎ ﻳﯧﮕﯜزﺳﻪك، ﺳﺎۋادى ﭼﯩﻘﺎرﻣﯘ؟
_ ﻗﻪﺷﻘﻪر ﺋﯧﻘﯩﻦ دەرﻳﺎ ﺑﺎﺷﻘﺎرﻣﯩﺴﯩﺪﯨﻦ: ﺋﺎﺑﻠﯩﻤﯩﺖ ﮬﻮﺷﯘر

ﺳﻮﺋﺎل: «ﺟﯩﮕﺪە ﻳﺎﻏﯩﭽﻰ ﺑﺎدرا ﺑﻮﻟﻤﺎس، دﯦﮭﻘﺎن ﺑﺎﻟﯩﺴﻰ ﻛﺎدﯨﺮ ﺑﻮﻟﻤﺎس» دﯦﮕﻪن ﻣﺎﻗﺎﻟﻨﻰ ﻗﺎﻧﺪاق ﭼﯜﺷﻪﻧﺴﻪك ﺑﻮلار؟
_ ﻛﻮﻧﯩﺸﻪﮬﻪر ﻧﺎﮬﯩﻴﻪ ﻳﯧﯖﯩﺌﯚﺳﺘﻪڭ ﻳﯧﺰا 6- ﻛﻪﻧﺘﯩﺪﯨﻦ: ﻣﯘﺧﺘﻪر ﮬﺎﺟﻰ

ﺳﻮﺋﺎل: ﻗﺎﻧﺪاق ﻗﯩﻠﺴﺎم، «ﻣﯘز ﭼﯩﺮاي» دﯦﮕﻪن ﺋﺎﺗﺎﻗﺘﯩﻦ ﻗﯘﺗﯘﻟﯘپ، «ﺋﯘز ﭼﯩﺮاي» ﺑﻮلارﻣﻪن؟
_ ﻣﻪﻛﯩﺖ ﻧﺎﮬﯩﻴﯩﻠﯩﻚ 1- ﺋﻮﺗﺘﯘرا ﻣﻪﻛﺘﻪپ ﺗﻮﻟﯘق 3- ﻳﯩﻠﻠﯩﻖ 6- ﺳﯩﻨﯩﭙﺘﯩﻦ: ﺋﯩﻤﺎﻣﻨﯩﻴﺎز ﺗﻮﺧﺘﻰ

ﺳﻮﺋﺎل: «ﺷﯧﺌﯩﺮﻧﯩﯔ ﺟﯧﻨﻰ ﮬﯧﺴﺴﯩﻴﺎت» دﯦﻴﯩﻠﯩﺪﯨﻜﻪن، ﺋﯘﻧﺪاﻗﺘﺎ ﮬﯧﺴﺴﯩﻴﺎﺗﻨﯩﯔ ﺟﯧﻨﻰ ﻧﯧﻤﯩﺪۇ؟
_ ﭘﻪﻳﺰاۋات ﻧﺎﮬﯩﻴﻪ ﺟﺎﻣﺒﺎز ﻳﯧﺰا ﺋﯜﺟﻤﯩﻠﯩﻚ ﻟﻪﯕﮕﻪر ﻛﻪﻧﺘﯩﺪﯨﻦ: ﻧﯘرﻣﯘﮬﻪﻣﻤﻪت ﺋﯩﻤﯩﻦ

ﺳﻮﺋﺎل: «ﺋﻪرﻧﯩﯔ ﻏﯧﻤﻰ ﺋﻪﻟﺪە» دﯦﮕﻪن ﮬﯧﻜﻤﻪﺗﻨﻰ ﮬﻪﻣﻤﻪﻳﻠﻪن ﺑﯩﻠﯩﻤﯩﺰ، ﺑﯜﮔﯜﻧﻜﻰ ﻛﯜﻧﺪە ﺋﺎﺋﯩﻠﯩﺴﯩﻨﯩﯔ، ﮬﻪﺗﺘﺎ ﺋﯚزﯨﻨﯩﯔ ﻏﯧﻤﯩﻨﯩﻤﯘ ﺗﯜزۈك ﻗﯩﻠﻤﺎس ﺑﻮﻟﯘۋاﻟﻐﺎن ﺑﯩﺮ ﻗﯩﺴﯩﻢ ﺋﻪرﻛﻪﻛﻠﻪرﻧﻰ « ﺋﻪر» دﯦﻤﻪﺳﻠﯩﻜﯩﻤﯩﺰ ﻛﯧﺮەﻛﻤﯘ؟
_ «ﻗﻪﺷﻘﻪر ﮔﯧﺰﯨﺘﻰ» ﺋﯩﺪارﯨﺴﯩﺪﯨﻦ ﺋﺎﺑﺪۇۋﯦﻠﻰ

ﺳﻮﺋﺎل: ﺧﻪﻟﻘﯩﻤﯩﺰدە ﺋﯩﻠﮕﯩﺮى «ﻗﺎﭘﺎق ﭘﯘل ﺋﻪﻣﻪس، ﺑﺎراڭ ﭘﯘل» دەﻳﺪﯨﻐﺎن ﻣﺎﻗﺎل ﺑﺎر ﺋﯩﺪى، ﻳﯧﻘﯩﻨﺪا ﮬﯜﻧﻪر- ﺳﻪﻧﺌﻪت ﺑﺎزﯨﺮﯨﺪﯨﻦ ﺋﯚﺗﯜپ ﻛﯧﺘﯩﯟﯦﺘﯩﭗ، دۇﻛﺎﻧﺪارﻧﯩﯔ رەﺳﯩﻢ ﺳﯩﺰﯨﻠﯩﭗ ﮔﯜل ﺋﯩﺸﻠﻪﻧﮕﻪن ﺑﯩﺮ ﻗﺎﭘﺎﻗﻨﻰ ﺧﯧﻠﻰ ﻛﯚپ ﭘﯘﻟﻐﯩﻤﯘ ﺳﺎﺗﻤﺎﻳﯟاﺗﻘﺎﻧﻠﯩﻘﯩﻨﻰ ﻛﯚرۈپ ﮬﻪﻳﺮان ﻗﺎﻟﺪﯨﻢ. ﻣﺎل ﺑﺎﮬﺎﺳﻰ ﺗﻮﺧﺘﯩﻤﺎي ﺋﯚﺳﯜۋاﺗﻘﺎن ﺑﯜﮔﯜﻧﻜﻰ ﻛﯜﻧﺪە ﺑﺎراﯕﻤﯘ ﺋﻪرزان ﭘﯘﻟﻐﺎ ﭘﯜﺗﻤﻪﻳﺪۇ. ﻗﺎرﯨﻐﺎﻧﺪا، ﮬﺎزﯨﺮ «ﻗﺎﭘﺎﻗﻤﯘ، ﺑﺎراﯕﻤﯘ ﭘﯘل» ﺑﻮﻟﯩﺪﯨﻐﺎن دەۋر ﻛﻪﻟﮕﻪن ﺋﻮﺧﺸﯩﻤﺎﻣﺪۇ؟
_ ﻣﻪﻛﯩﺘﺘﯩﻦ ﻳﺎﺳﯩﻨﺠﺎن ﺋﻮﺳﻤﺎن

ﺳﻮﺋﺎل: ﺑﯩﺰدە « ﺋﺎت ﺗﺎﭘﻘﯘﭼﻪ ﺋﯧﺸﻪك ﻣﯩﻦ» دەﻳﺪﯨﻐﺎن ﮔﻪپ ﺑﺎر ﺋﯩﻜﻪن، ﺋﯧﺸﯩﻜﻰ ﺑﺎرلارﻏﯘ ﺋﺎت ﺗﺎﭘﻘﯘﭼﻪ ﻣﯩﻨﯩﭗ ﺗﯘرار، ﺋﯧﺸﯩﻜﯩﻤﯘ، ﺋﯧﺘﯩﻤﯘ ﻳﻮق ﻣﻪﻧﺪەﻛﻠﻪر ﻧﯧﻤﯩﻨﻰ ﻣﯩﻨﻪر؟
_ ﻣﻪﻛﯩﺘﺘﯩﻦ ﻳﺎﺳﯩﻨﺠﺎن ﺋﻮﺳﻤﺎن

ﺳﻮﺋﺎل: ﻛﻮﻧﯩلار: «ﺑﻪﺧﺘﻨﻰ ﻧﻪﮔﻪ ﺑﺎرﯨﺴﻪن دﯦﺴﻪ، دوﻗﺎﻣﺎﯕلاﻳﻨﯩﯔ ﻗﯧﺸﯩﻐﺎ»دەﻳﻤﯩﺶ، دﯦﻴﯩﺸﯩﺪﯨﻜﻪن. ﺋﯘﻧﺪاق ﺑﻮﻟﺴﺎ، ﺑﻪﺧﺘﻨﯩﯔ ﮬﻪﻣﻤﯩﺴﻰ دوﻗﺎ ﻣﺎﯕلاﻳﻨﯩﯔ ﻗﯧﺸﯩﻐﺎ ﻛﻪﺗﺴﻪ، دوﻗﺎ ﻣﺎﯕلاي ﺑﻮﻟﻤﯩﻐﺎﻧلار ﺑﻪﺧﺘﺴﯩﺰ ﺑﻮﻟﯘپ ﻗﺎلارﻣﯘ؟
_ ﻳﻪﻛﻪن ﻧﺎﮬﯩﻴﻪ ﺑﻪﺷﻜﻪﻧﺖ ﺑﺎزار ﺑﺎﻏﺘﻮﻏﺮاق 2- ﻛﻪﻧﺘﺘﯩﻦ ﮬﯚرﻣﻪﺗﮕﯜل ﻣﯘﮬﻪﻣﻤﻪﺗﻨﯩﻴﺎز

ﺳﻮﺋﺎل: «ﺳﺎراﯕﻨﯩﯔ ﺑﯩﺮ ﻗﯩﻠﯩﻘﻰ ﺋﺎرﺗﯘق» دﯦﮕﻪن ﮔﻪپ ﺑﺎر ﺋﯩﻜﻪن. ﺋﯘﻧﺪاﻗﺘﺎ، ﺳﺎراﯕﺪﯨﻜﻰ ﺷﯘ ﺋﺎرﺗﯘق ﻗﯩﻠﯩﻖ ﻗﺎﻳﺴﯩﺪۇر؟
_ ﻣﻪﻛﯩﺖ ﻧﺎﮬﯩﻴﯩﻠﯩﻚ 1 - ﺋﻮﺗﺘﯘرا ﻣﻪﻛﺘﻪﭘﺘﯩﻦ: ﻳﺎﺳﯩﻨﺠﺎن ﺋﻮﺳﻤﺎن

ﺳﻮﺋﺎل: ﻣﻪن دەم ﺋﯧﻠﯩﺶ ﻛﯜﻧﻠﯩﺮﯨﺪە ﻛﯚﭘﯩﻨﭽﻪ ﻛﯩﻨﻮﺧﺎﻧﯩلارﻏﺎ ﺑﯧﺮﯨﭗ ﻛﯩﻨﻮ ﻛﯚرﯨﻤﻪن، ﺑﯘ ﺟﻪرﻳﺎﻧﺪا رول ﺋﯧﻠﯩﯟاﺗﻘﺎن ﭼﻮﻟﭙﺎﻧلارﻧﻰ ﻛﯚرﺳﻪم ﻣﯧﻨﯩﯖﻤﯘ ﭼﻮﻟﭙﺎن ﺑﻮﻟﻐﯘم ﻛﯧﻠﯩﺪۇ؛ ﺗﻪﻧﺘﻪرﺑﯩﻴﻪ ﻣﯘﺳﺎﺑﯩﻘﯩﻠﯩﺮﯨﺪﯨﻜﻰ ﻏﺎﻟﯩﺐ ﺋﻪزﯨﻤﻪﺗﻠﻪرﻧﻰ ﻛﯚرﺳﻪم ﻣﯧﻨﯩﯖﻤﯘ ﭼﯧﻤﭙﻴﻮن ﺑﻮﻟﻐﯘم ﻛﯧﻠﯩﺪۇ. ﺑﯩﺮاق، ﺑﯩﺮلا ۋاﻗﯩﺘﺘﺎ ﮬﻪم ﭼﻮﻟﭙﺎن، ﮬﻪم ﭼﯧﻤﭙﻴﻮن ﺑﻮﻟﻐﯩﻠﻰ ﺑﻮﻟﻤﺎﻳﺪﯨﻐﺎﻧﺪەك ﻗﯩﻠﯩﺪۇ، ﻗﺎﻳﺴﯩﺴﯩﻨﻰ ﺗﺎﻟﻠﯩﺴﺎم ﺑﻮلار؟
_ ﭼﯩﺮا ﻧﺎﮬﯩﻴﻪ ﮔﯘلاﺧﻤﺎ ﻳﯧﺰا ﺋﺎراﺋﯚﺳﺘﻪڭ ﻛﻪﻧﺘﯩﺪﯨﻦ: ﮬﻪﺳﻪﻧﺠﺎن رەﺟﻪپ

ﺳﻮﺋﺎل: ﺋﻮﻏﯘﻟلار ﺗﻮي ﻗﯩﻠﯩﺸﺘﯩﻦ ﺑﯘرۇن ﺑﯩﺮﻧﻪﭼﭽﻪ ﻗﯩﺰ ﺑﯩﻠﻪن ﻣﯘﮬﻪﺑﺒﻪﺗﻠﯩﺸﯩﭗ، ﺷﯘلار ﺋﺎرﯨﺴﯩﺪﯨﻦ ﺑﯩﺮﯨﻨﻰ ﺗﺎﻟلاپ ﺗﻮي ﻗﯩﻠﺴﺎ ﻳﺎﺧﺸﯩﻤﯘ ﻳﺎﻛﻰ ﺑﯩﺮلا ﻗﯩﺰ ﺑﯩﻠﻪن ﻣﯘﮬﻪﺑﺒﻪﺗﻠﯩﺸﯩﭗ ﺗﻮي ﻗﯩﻠﺴﺎ ﻳﺎﺧﺸﯩﻤﯘ؟
_ ﻳﻮﭘﯘرﻏﺎ ﻧﺎﮬﯩﻴﻪ ﺗﯧﺮﯨﻢ ﻳﯧﺰﯨﺴﯩﺪﯨﻦ: ﺗﯘرﻏﯘﻧﺠﺎن ﺋﺎﺑلا ﺗﯧﺮﯨﻤﻰ

ﺳﻮﺋﺎل: ﻛﻮﻧﯩلار: «ﺧﻪﻟﻖ ﭘﯜۋ دﯦﺴﻪ ﺑﻮران ﭼﯩﻘﯩﺪۇ» دەﻳﺪﯨﻜﻪن. ﺑﯘ ﻛﻮﻧﯩلارﻧﯩﯔ ﻧﯧﻤﻪ دﯦﮕﯩﻨﻰ؟
_ ﻗﻪﺷﻘﻪر ﺷﻪﮬﻪرﻟﯩﻚ 26 - ﺋﻮﺗﺘﯘرا ﻣﻪﻛﺘﻪپ ﺗﻮﻟﯘق 2 - ﻳﯩﻠﻠﯩﻖ 4 - ﺳﯩﻨﯩﭙﺘﯩﻦ: ﻣﯘﮬﻪﻣﻤﻪﺗﺠﺎن ﮬﺎﭘﯩﺰ

ﺳﻮﺋﺎل: دادام ﻣﺎﯕﺎ ﻧﻪﺳﯩﮭﻪت ﻗﯩﻠﯩﭗ «ﺋﯩﭽﻰ ﻳﺎﻣﺎن ﺳﻪﻣﺮﯨﻤﻪس» دەﻳﺪۇ. ﺋﯘﻧﺪاﻗﺘﺎ، ﺋﻮرۇق ﺋﺎدەﻣﻠﻪرﻧﯩﯔ ﮬﻪﻣﻤﯩﺴﯩﻨﯩﯔ ﺋﯩﭽﻰ ﻳﺎﻣﺎن ﺑﻮلاﻣﺪۇ؟
_ ﻳﻪﻛﻪن ﻧﺎﮬﯩﻴﻪ ﻛﺎﭼﯘڭ ﻳﯧﺰﯨﻠﯩﻖ ﺋﻮﺗﺘﯘرا ﻣﻪﻛﺘﻪﭘﺘﯩﻦ: ﺋﺎﻳﮕﯜل ﻣﻪﻣﺘﯩﻤﯩﻦ، ﺑﯘﺗﯘرﺳﯘﻧﺨﺎن ﺋﻪﺧﻤﻪت

بۇ يەرنى چېكىپ، جاۋاب يوللاش بېتىگە كىرىڭ